陸羽仁 --意外 1/4/2011

意外 1/4/2011

美股衝高未破，從高位略回。非農就業報告前夕，美股缺乏方向，買賣兩閒，杜指全日大部份時間在上日收市位窄幅構行。午後明尼阿波利斯聯邦儲備銀行行長話，聯儲局2011年尾可能加息對抗通脹，杜指臨收市來一個小插插，不過跌幅唔係好大，收12320點，跌31點；標普500指數挫2點至1326點。不過納指仍有進賬，收市升4點，造2781點。杜指期貨最新報12278點，較現貨低水42點。



港股美國預託證券偏軟，ADR港比指數報23442點，比香港收市低86點或0.4%。匯控收80.59元，比香港低1.4%，中移動收71.95元，比香港高0.4%。



美股終於走完這個多事的三月。日本大地震加中東開打，曾一度令杜指下挫6.3%，跌穿去年底收市位，不過好快就反彈，收復所有失地。3份基本持平，以整個季度就有好大收穫，杜指漲咗6.4%，而且係過去八個季度中第七次收高。標普500指數升5.4%，係自1998年以來表現最好的一季。



非農就業數據今日出爐，德意志銀行美國股市部門負責人Owen Fitzpatrick話，「就業狀況正在朝正確的方向前進，市場對明天的就業報告寄予厚望。」市場預期3月份職位增長會有20萬個，略為好於上月的19.2萬個，而失業率會維持在8.9%。不過，受日本核洩漏有擴大趨勢，利比亞戰鬥持續，歐洲債務危機升溫，愛爾蘭四大銀行昨日就宣佈要集資240億歐元，才能渡過難關。投資者態度普遍謹慎。



昨日的市場焦點係股神旗下的巴郡，股神宣佈一度被視為他的第一接班人 David Sokol已從該公司辭職。市場猜測係由於David Sokol買進入價值約1000萬美元的Lubrizol股票之後，鼓動巴菲特收購該公司的事情曝光所致。管理層發生地震，巴郡A及B股齊跌逾2%。　　



科網股騰訊（00700）主席馬化騰的減持事件比較離奇，值得一書。騰訊昨日逆市跌近3%，收報189.5元，主要因為馬化騰再減持股份，聯交所資料顯示，馬化騰於周一在場外每股，平均價67.806元，減持騰訊200萬股，出售價較市價低65%。

    咁大折讓大出血賣股，十分離奇，騰訊發言人解釋，今次馬氏減持，馬化騰今次沽貨與去年6月因參與鎖定利潤策略期權組合（Collar Option Strategy）到期沽股類同，屬於主席個人財務安排。資料顯示，馬化騰在去年6月7日，在場外以每股102.7元沽出500萬股騰訊，較當日股價折讓超過30%。而剛剛減持的200萬股短倉合約，卻是在09年3月25日簽訂，當時騰訊股價只是55元，同日馬氏另有4份共800萬股短倉合約出現，相信是同一時間簽訂的淡倉期權組合，在4月到期，未被行使。另有一份在8月到，另有500萬股短倉，同樣未被行使。即係話未來仲有1300萬股平貨出街，難怪騰訊股價有壓力。



    呢個故事教訓大家，賭衍生工具好易輸錢。馬化騰沽出的東西，類似沽出認沽期權或者沽出認沽輪，即係佢沽呢啲衍生工具收權期金，到期唔到價佢食哂啲期權金，但如今到價，佢卻要按指定價格沽貨俾人。2年前騰訊只是55元，馬化騰開出67.806元的期權，相信當日估計好難到呢個價，就算到都唔會超好多，所以馬化騰開盤賺期權金，點知騰訊做得咁好，市場又咁睇好，出哂主席意料之外。



    馬化騰要將價值190元的股份，用67元沽出，當然好肉痛。但佢都唔輸得哂，因為佢在09年以1.6億買入東半山名門頂層複式單位，2010年又以4.8億買入石澳道13號屋，假設佢只是付3成首期，兩間屋夾埋都要俾1.9億首期，佢當年減持股份及收期權金，相當一部份用咗去買屋，如今屋價升值，雖然無佢自己隻股升咁多，但都可以幫補吓。



    馬化騰低價沽咗咁多認沽期權，無好大動力推高公司股價，因為股價高都只係益咗人，無怪乎騰訊最近公布業績時，好負責任咁對前景作出較審慎的預測，其老實程度係上市公司罕見。無論如何，騰訊未來有咁多平貨出街，收咗貨的機構都好大機會即刻沽貨獲利，騰訊短期都好難有運行。從呢個故事可見，上市公司主席都唔係咁易估到公司股價，何況其他人。



陸羽仁