2013-12-16 13:38
sinta
土豪世冠晉級 拜仁都怕怕？
首次出戰世冠盃嘅中超廣州恒大，前日喺半準決賽贏艾阿里2:0，殺入4強，將會喺周二同今季德甲冬季冠軍拜仁慕尼黑爭入決賽。雖則拜仁牌面贏晒，但都唔敢睇小呢隻「華南虎」，教練哥迪奧拿仲驚驚哋，係咁煲恒大嘅比賽錄影帶㖭。
[img]http://static.apple.nextmedia.com/images/apple-photos/apple/20131216/large/16s3-605p.jpg[/img]
■孔卡（左一）埋齋，幫恒大贏艾阿里2:0。路透社
[b]同拜仁爭入決賽[/b]
亞冠盃盟主恒大，雖然係第一次踢世冠盃，但話晒有鄭智、穆里奇同孔卡等好手壓陣，加上由意大利名帥納比領軍，實力一啲都唔差。前晚佢哋對住非洲代表艾阿里，半場踢成0:0，不過喺換邊後由艾傑臣同孔卡各入一球，最終贏2:0晉級，如願喺4強鬥應屆歐聯盟主拜仁，仲至少有200萬美金（約1,550萬港元）獎金落袋，今季總獎金亦達到成3.14億港銀。同日另一場8強，拉查體育會加時以2:1贏蒙特雷，喺周三就會同明尼路爭入決賽。
畢竟雙方實力有距離，所以納比都唔敢亂噏話可以入決賽。佢咁講：「我哋好榮幸可以同拜仁比賽，冇人知結果係點，但踢100場，恒大或者有機會贏一次。」大陸啲粉絲同納比一樣咁理智，根據《新浪網》做嘅意見調查顯示，逾7成投票人士都唔認為恒大可以贏拜仁。
前日喺德甲迎戰漢堡，係拜仁2013年最後一場主場比賽，所以佢哋班球員賽前喺安聯球場唱聖誕歌，提早同粉絲慶祝。講番場波，佢哋憑文迪蘇傑、馬里奧葛斯同埋梳頓沙基利各入1粒，輕鬆贏3:1，頭16場聯賽取得14勝2和，肯定成為冬季冠軍。
[b]哥迪奧拿煲帶吼路[/b]
踢完呢場波之後，佢哋隨即飛去摩洛哥，備戰周二對恒大場世冠盃4強戰。教頭哥迪奧拿都唔敢輕敵，除咗對漢堡嗰場留力，只係畀列貝利後備踢26分鐘，而且一落機就返酒店狂煲恒大對艾阿里嘅比賽錄影帶，睇吓對方有乜破綻。
拜仁擸咗德甲、德盃、歐聯同歐超盃，如果贏埋世冠盃，就成為5冠王，梗係唔想俾恒大壞佢哋好事啦。哥迪奧拿話：「2013年對拜仁嚟講肯定係難以置信嘅一年。我哋要喺摩洛哥，贏今年最後一個錦標。」至於拜仁隊長拿姆就講：「我哋努力咗咁多年，終於喺2013年有回報。但今年未完，我哋會傾力攞埋個世冠盃，希望喺2014年繼續成功。」
[img]http://static.apple.nextmedia.com/images/apple-photos/apple/20131216/large/img0000030_aa03.gif[/img]
來源:蘋果日報網站